മനസ്സുനിറക്കുന്ന പ്രിയന്റെ ഓട്ടം ! ഒപ്പം സർപ്രൈസായി മെഗാസ്റ്റാർ മമ്മൂട്ടിയും

ഷറഫുദ്ദീനെ നായകനാക്കി ആന്റണി സോണി സംവിധാനം ചെയ്ത മലയാള ചിത്രമാണ് ‘പ്രിയൻ ഓട്ടത്തിലാണ്’. ക്ലീൻ യു സർട്ടിഫിക്കറ്റോടെ ചിത്രം ഇന്ന് തിയറ്ററുകളിലെത്തി. മികച്ച പ്രതികരണങ്ങളാണ് ലഭിക്കുന്നത്. ആദ്യ പകുതി പ്രിയനെയും പ്രിയന് പ്രിയപ്പെട്ടവരേയും പരിചയപ്പെടുത്തുന്നു. ശേഷം പ്രിയന്റെ ഓട്ടത്തിനുളള ആരംഭം കുറിക്കുന്നു. രണ്ടാം പകുതിയിൽ ആരംഭിക്കുമ്പോൾ പ്രിയന്റെ ഓട്ടം ലക്ഷ്യ സ്ഥാനത്തെത്തുമെന്നും ഇതിനൊരു അവസാനമുണ്ടാവുമെന്നും നമ്മൾ വിചാരിക്കും. പക്ഷെ സിനിമ കഴിയുന്നേരം മനസ്സിലാവും അത് അസ്വഭാവികമാണെന്ന്. പ്രിയൻ പ്രിയനായിരിക്കുന്നിടത്തോളം കാലം അവന്റെ ഓട്ടം അവസാനിക്കില്ല.

പ്രിയനെ ചിലർക്ക് റിലേറ്റബിളായി തോന്നും. അവനെപ്പോലുള്ളവർ നമുക്കിടയിലുണ്ട്. ഒരു കാര്യത്തിന് വരാൻ പറഞ്ഞാൽ നൂറ് കാര്യങ്ങൾ ചെയ്ത് എല്ലായിടത്തും താമസിച്ചെത്തുന്നവർ. അത്തരക്കാരുടെ ജീവിതത്തിലൂടെ ഒരു ദിവസമെങ്കിലും കടന്നു പോയവർക്കും അവരുടെ ജീവിതത്തിന്റെ ഭാ​ഗമായവർക്കും പ്രിയനെയും പ്രിയന്റെ മാനസികാവസ്ഥയും മനസ്സിലാക്കാനാവും. അല്ലാത്തവർക്ക് ഇവനിതിന്റെയൊക്കെ ആവശ്യകതയെന്തായിരുന്നു എന്നേ ചിന്തിക്കൂ.

പ്രിയനെ മനോഹരമായി ഷറഫുദ്ദീൻ അവതരിപ്പിച്ചിട്ടുണ്ട്. നൈല ഉഷ, അപർണ ദാസ് എന്നിവരാണ് നായികമാരായെത്തിയിരിക്കുന്നത്. ഇരുവരും അവരവരുടെ റോൾ കൃത്യമായി നിർവ്വഹിച്ചിട്ടുണ്ട്. ചിത്രം കോമഡി എന്റർടൈനറാണ് എന്നതിനാൽ തന്നെ എല്ലാ പ്രേക്ഷകർക്കും ആസ്വദിക്കാനാവും. ചിത്രത്തിലെ ക്ലൈമാക്സിനോടടുക്കുന്ന പ്രധാന ഘട്ടത്തിൽ മമ്മുട്ടി അതിഥി വേഷത്തിലെത്തുന്നുണ്ട്. വൗവ് സിനിമാസിന്റെ ബാനറിൽ സന്തോഷ് തൃവിക്രമനാണ് ചിത്രം നിർമ്മിച്ചിരിക്കുന്നത്. അഭയകുമാർ കെ, അനിൽ കുര്യൻ എന്നിവരുടെതാണ് തിരക്കഥ. പി. എം. ഉണ്ണികൃഷ്ണൻ ഛായാഗ്രഹണം നിർവ്വഹിച്ച ചിത്രത്തിന്റെ എഡിറ്റിംങ് ജോയലാണ് കൈകാര്യം ചെയ്തിരിക്കുന്നത്. അഭയകുമാർ കെ യും, പ്രജീഷ് പ്രേം എന്നിവരുടെ വരികൾക്ക് ലിജിൻ ബംബീനോ സംഗീതം പകർന്നു. ​

വിഡ്ഡികളുടെ മാഷ് റിവ്യൂ വായിക്കാം

കൊച്ച് കൊച്ച് കുരുത്തക്കേടിലൂടേയും … കുസൃതികളിലൂടേയും … നിഷ്കളങ്കമായ സ്നേഹ ബന്ധങ്ങളിലൂടേയും കടന്നു പോയ നായകൻ അത്തരം അനുഭവങ്ങളിൽ നിന്നും പഠിച്ചെടുത്ത ജീവിതാനുഭവങ്ങളിലൂടെ കിട്ടിയ നല്ലതും കെട്ടതുമായ അനുഭവങ്ങളെ തന്റെ വിദ്യാർത്ഥികൾക്ക് ഒരു ഗുണപാഠമാക്കിക്കൊണ്ട് അവരെ നൻമയുടെ വഴിയിലേക്ക് എങ്ങിനെ നയിക്കാം , അതിലൂടെ ഒരു വിദ്യാലയത്തെ എങ്ങിനെ ഒരു മാതൃകാ വിദ്യാലയമാക്കാമെന്ന് അഭ്രപാളികളിലൂടെ നമ്മിലേക്ക് പകർത്തിയ ലളിതവും നർമ്മവും ഉൾക്കൊണ്ട മനോഹരമായ ചലച്ചിത്രാനുഭവം.

അവസരത്തിനൊത്തുയർന്ന റഫീഖ് അഹമമദിന്റെ വരികൾക്ക് കാവ്യഭംഗി നൽകിയ ബിജിബാലിന്റെ സംഗീതം മലയാളികളുടെ വാനമ്പാടി കെ എസ് ചിത്രയും യുവ ഗായകൻ സൂരജ് സന്തോഷും ആലപിച്ചിരിക്കുന്നു. പുതിയൊരു അദ്ധ്യാപക വിദ്യാർത്ഥി ബന്ധം ഉടലെടുക്കുന്നുണ്ടെങ്കിൽ ഈ സിനിമ അതിനൊരു നിമിത്തമായിത്തീരും.

രണ്ട് മണിക്കൂർ പോയതറിയാതെ ഈ അടുത്ത കാലത്ത് കണ്ട സിനിമയിൽ മനസ്സിൽ ഇടം നേടിയ ചിത്രം.

നഷ്ടപ്പെടുത്തരുത് ഈ തിയറ്റർ അനുഭവം ! ഇന്ത്യൻ സിനിമയിലെ മാസ്റ്റർ പീസാവുന്ന വിക്രം

പാൻ ഇന്ത്യൻ ചിത്രമല്ലാഞ്ഞിട്ട് പോലും ലോകേഷ് കനകരാജിന്റെ തമിഴ് ചിത്രം ‘വിക്രം’ മിന് വേണ്ടിയുള്ള കാത്തിരിപ്പിലായിരുന്നു ആരാധകരും പ്രേക്ഷകരും. ഉലകനായകൻ കമൽഹാസനാണ് നായകനെങ്കിലും ഫഹദ് ഫാസിൽ, വിജയ് സേതുപതി, സൂര്യ, ഇവരെ കാണാനാൻ വേണ്ടി സിനിമ കാണാനെത്തിയവരുണ്ട്.

വന്നവരെയൊന്നും ലോകേഷ് നിരാശപ്പെടുത്തിയിട്ടില്ല. കാളിദാസനും നരേനും ചെമ്പൻ വിനോദും പ്രധാന വേഷത്തിലെത്തുന്ന ചിത്രത്തിൽ മാസ്സും ആക്ഷനും ത്രില്ലറും ചേരുമ്പോൾ തിയറ്ററുകളിൽ തീ പാറുന്നുണ്ട്. പ്രേക്ഷകർക്കൊന്ന് ശ്വാസമെടുക്കാനുള്ള ​ഗ്യാപ്പ് പോലും കൊടുക്കുന്നില്ല.

പ്രപഞ്ചന്റെ മരണത്താൽ സീരിയൽ കില്ലറിനെ തിരഞ്ഞു നടക്കുന്ന ഫഹദിലൂടെ സന്താനത്തിലെത്തുന്ന ചിത്രം വിക്രമിന്റെ വരവോടെ വൻ ഹൈപ്പാണ് പ്രേക്ഷകരിലുണ്ടാക്കുന്നത്. ആദ്യ പകുതിയെ കടത്തി വെട്ടുന്നതാണ് രണ്ടാം പകുതി. വില്ലനും നായകനും നേർക്ക്നേർ നിൽക്കുമ്പോൾ ചുറ്റും പരക്കുന്ന വെടിയുണ്ടകളുടെ ശബ്ദത്തിന്റെ പതിമടങ്ങ് ഉയർച്ചയിൽ പ്രേക്ഷകരുടെ ഹൃദയം പടാ പടാ മിടിക്കും.

ഒന്നങ്ങോട്ടോ ഇങ്ങോട്ടോ നോക്കാതെ കണ്ണിമവെട്ടാതെ ചിത്രത്തിലേക്ക് തന്നെ നോക്കിനിൽക്കും. താനൊരു സംവിധായകനാണെന്ന് ലോകേഷ് നേരത്തെ തെളിയിച്ചിട്ടുണ്ടെങ്കിലും ‘വിക്രം’ കണ്ടതോടെ പ്രേക്ഷകർക്കത് പൂർണ്ണമായും ബോധ്യമാവുന്നുണ്ട്.