സ്പർശനം കൊണ്ട് നിയന്ത്രിക്കാവുന്ന ഫോൺ! 2007ൽ പുറത്തു വന്ന സ്മാർട്ട് ഫോൺ പ്രഖ്യാപന വാർത്ത.

സ്മാർട്ട് ഫോണുകൾ മനുഷ്യരുടെ ജീവിതത്തിൽ ചെലുത്തിയ സ്വാധീനം ചെറുതല്ല. ഒരു മനുഷ്യൻറെ നിത്യജീവിതത്തിൽ 90% ആവശ്യങ്ങളും പൂർണ്ണമാക്കുന്നതിൽ ഏതെങ്കിലും ഒരു ഭാഗത്ത് സ്മാർട്ട് ഫോണിന്റെ പങ്ക് ഉണ്ടാവും. പലരും തങ്ങളുടെ ശരീരത്തിൻറെ ഒരു അവയവം പോലെയാണ് മൊബൈൽ ഫോൺ കൊണ്ടു നടക്കുന്നത്. സ്മാർട്ട് ഫോണുകൾ ഇല്ലാതിരുന്ന കാലഘട്ടവും അത്ര വിദൂരത്തൊന്നുമായിരുന്നില്ല. ഒന്ന് ഇരുത്തി ഓർമിച്ചാൽ കിട്ടാവുന്ന കാലദൂരം മാത്രമേ അതിന് ഉണ്ടാവുകയുള്ളൂ, അത്തരം ഒരു ഓർമ്മപ്പെടുത്തലിന്റെ കൗതുകപരമായ ഒരു പത്രവാർത്തയാണ് ഇത്. 2007 മാതൃഭൂമി ദിനപത്രത്തിൽ വന്ന ഒരു വാർത്താ ഭാഗം.

“മൊബൈൽ ഫോൺ രംഗത്ത് വിപ്ലവാത്മകമായ മാറ്റങ്ങൾക്ക് വഴിയൊരുക്കുന്നതാവും ഐഫോണിന്റെ വരവ്. ആപ്പിൾ ഇൻകോർപ്പറേഷൻ തങ്ങളുടെ പുതിയ ഉത്പന്നമായ ഐഫോണിനെ പറ്റി ലോകത്തോട് പറഞ്ഞപ്പോൾ തന്നെ ഓഹരി വിപണിയിൽ അവരുടെ ഓഹരിയിൽ ഉണ്ടായ വില വർധന നാളെയുടെ ഫോണാണ് ഐഫോൺ എന്നതിന് തെളിവാണ്. സംഗീതം ശ്രവിക്കാനും വീഡിയോ കാണുന്നതിനും ഇൻറർനെറ്റ് സെർവ് ചെയ്യാനും ഒപ്പം മൊബൈൽ ഫോൺ ആയും ഉപയോഗിക്കാവുന്ന ഐഫോൺ ജൂൺമാസത്തോടെ വിപണിയിൽ എത്തും. ഐപോഡ് മൊബൈൽ ഫോൺ ഇൻറർനെറ്റ് സർവീസ് സംവിധാനം എന്നിവ ഒരുമിച്ച് സാധ്യമാകുന്ന ഐഫോൺ ഈ രംഗത്തെ പുതുതലമുറക്കാരനാണ്.

ഐഫോണിന്റെ പ്രവർത്തനത്തെ ഒരു വിരൽ സ്പർശനത്തിലൂടെ നിയന്ത്രിക്കാനാവും എന്നതാണ് ഏറ്റവും വലിയ പ്രത്യേകത 3.5 ഇഞ്ച് വൈഡ് സ്ക്രീൻ ഡിസ്പ്ലേയിലൂടെ സംഗീതം, വീഡിയോ, ടിവി ഷോ, സിനിമകൾ തുടങ്ങിയവ ആസ്വദിക്കാനാവും. ഐടൂൻ അല്ലെങ്കിൽ പേഴ്സണൽ കമ്പ്യൂട്ടറുമായി ബന്ധപ്പെടുത്തി ഇവയെ ഐഫോണിൽ ശേഖരിക്കാം. വിരൽസ്പർശത്തിലൂടെ തന്നെ ഗാനത്തിലേക്കും ആൽബത്തിലേക്കും പ്ലേലിസ്റ്റിലേക്കും ഒക്കെ സഞ്ചരിക്കാം. വീഡിയോയിൽ ആകട്ടെ ഇതേവരെ ലഭ്യമാവാതിരുന്ന ഒട്ടനവധി സവിശേഷതകളും ഐഫോൺ സാധ്യമാക്കുന്നു.

ഒന്ന് ഫോൺ ചെയ്യണമെങ്കിൽ അഡ്രസ് ബുക്കിലുള്ള പേരിലോ അല്ലെങ്കിൽ നമ്പറിലോ ഒന്ന് സ്പർശിച്ചാൽ മതിയാകും കൂടാതെ സാധാരണ അഡ്രസ് ബുക്കിന് ഉപരിയായി സ്ഥിരമായി ഉപയോഗിക്കുന്ന നമ്പറുകൾ ചേർത്ത് ഒരു ഫേവറേറ്റ് ലിസ്റ്റും ഐഫോണിന് ഉണ്ടാക്കാനാകും. ഇതിൽ ഉപയോഗിച്ചിരിക്കുന്ന കീബോർഡ് ആകട്ടെ മറ്റു ഫോണുകളിൽ നിന്ന് തികച്ചും വ്യത്യസ്തമാണെന്നാണ് നിർമ്മാതാക്കളായ ആപ്പിൾ അവകാശപ്പെടുന്നത്. രണ്ട് മെഗാ പിക്സൽ ക്യാമറയും ഐഫോണിൽ ഉണ്ട്.

ഇൻറർനെറ്റ് സെർച്ച് ചെയ്യാനായി ഐഫോണിൽ ഉള്ളത് സഫാരി ബ്രൗസർ ആണ്. ഗൂഗിൾ യാഹൂ സർവീസുകൾ സഫാരിക്ക് ഒപ്പം തന്നെ ഉണ്ടാകും. വൈഫൈ എഡ്ജ് ബ്ലൂടൂത്ത് സംവിധാനങ്ങളും ഉണ്ട്. ഫോണിൽ തന്നെ ഗൂഗിൾ മാപ്പ് ഉള്ളതും മറ്റൊരു പ്രത്യേകതയാണ്. കാലാവസ്ഥ സൂചന, ഓഹരി വിപണിയെ സംബന്ധിച്ച സൂചനകൾ എന്നിവ അറിയാൻ സംവിധാനങ്ങളും ഐഫോണിൽ ഉണ്ടാകും.

ആഗോളതലത്തിൽ തന്നെ ഉപയോഗിക്കുന്ന ക്വാഡ് ബ്രാൻഡ് ജി എസ് എം ആണ് വയർലെസ് കമ്മ്യൂണിക്കേഷൻ വേണ്ടി ഐഫോണിൽ ഉപയോഗിക്കുന്നത്. ആക്സിലോമീറ്റർ ആണ് ഐഫോണിന്റെ മറ്റൊരു പ്രത്യേകത ഫോണിനെ ലംബമായി തിരിച്ചാലും തിരശ്ചീനമായി തിരിച്ചാലും സ്ക്രീനിൽ ഉള്ള അക്ഷരങ്ങളും ചിത്രങ്ങളും ഒക്കെ നമുക്ക് വായിക്കാനും കാണാനും പറ്റുന്ന തരത്തിൽ സ്വയം മാറുന്ന സംവിധാനമാണിത്. ഒപ്പം ഫോൺ ചെവിയോട് അടുപ്പിക്കുമ്പോൾ ഇതിൻറെ ഡിസ്പ്ലേ സ്വയം ഓഫ് ആവും ,ബാറ്ററി ചാർജ് ലാഭിക്കാനാണ് ഐഫോണിൽ ഈ സംവിധാനം ഒരുക്കിയിരിക്കുന്നത്. 135 ഗ്രാം ഭാരമുള്ള ഐഫോണിൽ എസ് എക്സ് ഓപ്പറേറ്റിങ് സിസ്റ്റമാണ് ഉപയോഗിച്ചിരിക്കുന്നത്. നാല് മുതൽ 8gb വരെയാണ് സംവരണശേഷി. ജൂണിൽ ഇവ വിപണിയിലെത്തിയാൽ ഉടൻതന്നെ കേരളവിപണിയിലും ലഭ്യമാക്കി തുടങ്ങുമെന്ന് കൊച്ചിയിലെ ഐടി നെറ്റ് സെയിൽസ് ഡയറക്ടർ ഐ ഫൈസൽ പറഞ്ഞു.”