ജിആര്‍പിയിലും വമ്പൻ കുതിപ്പുമായി ബിഗ് ബോസ് സീസൺ 6 ചരിത്രം സൃഷ്ടിക്കുന്നു

ഇന്ന് മലയാളി സദസ്സുകളിൽ ഒഴിച്ചുകൂടാൻ ആവാത്ത വിഷയമായി മാറിക്കൊണ്ടിരിക്കുകയാണ് ബിഗ് ബോസ് സീസൺ 6. മത്സരം ചൂടുപിടിച്ച് മുറുകുമ്പോൾ മലയാളികളും ആവേശത്തിലാണ്. ഇതിനോടകം തന്നെ സീസൺ 6ൽ നിരവധി ആരാധകരെ നേടിക്കൊണ്ട് മുന്നേറുകയാണ് ബിഗ് ബോസ്. ഇപ്പോൾ കാഴ്ചക്കാരിലും റേറ്റിങ്ങിലും പുതിയ റെക്കോർഡുകൾ തീർത്തിരിക്കുകയാണ് ജനപ്രിയ ഗെയിം ഷോ. ബിഗ് ബോസ് മലയാളം സീസണ്‍ ആറിന് മികച്ച പ്രേക്ഷക പിന്തുണയുണ്ടെന്നാണ് ഏറ്റവുമൊടുവിൽ പുറത്തുവന്ന ജിആര്‍പി (ഗ്രോസ് റേറ്റിംഗ് പോയന്റ്) റേറ്റിംഗ് വ്യക്തമാക്കുന്നത്. 247 ജിആര്‍പിയാണ് കഴിഞ്ഞ ആഴ്ച ബിഗ് ബോസിനു ലഭിച്ചിരിക്കുന്നത്.

വളരെയധികം മാറ്റങ്ങളോടെയാണ് ബിഗ് ബോസിന്റെ ആറാം സീസൺ എത്തിയിരിക്കുന്നത്. ബിഗ് ബോസിൽ നാലു ബെഡ് റൂമുകൾ എന്ന കൺസെപ്റ്റ് ആദ്യമായി വന്നത് ഈ സീസണിലാണ്. പവർ റൂം കൺസെപ്റ്റ് ഈ സീസണിൽ വലിയ രീതിയിൽ കണ്ടന്റുകൾ നൽകുന്നുണ്ട്.
മാത്രമല്ല, മലയാളം ബിഗ് ബോസിലേക്ക് ആദ്യമായാണ് ആറു വൈൽഡ് കാർഡ് എൻട്രികൾ ഒന്നിച്ചു കടന്നുവന്നതും. സീക്രട്ട് ഏജന്റ് എന്ന പേരില്‍ വാര്‍ത്തകളില്‍ ഇടംനേടുന്ന സായ് കൃഷ്‍ണ, നടൻ അഭിഷേക് ശ്രീകുമാര്‍, അവതാരക നന്ദന, എല്‍ജിബിടിക്യു ആക്റ്റിവിസ്റ്റ് അഭിഷേക് ജയദീപ്, അവതാരക പൂജ, ഡിജെ സിബിൻ എന്നിവരാണ്  വൈല്‍ഡ് കാർഡ് എൻട്രിയായി ബിഗ് ബോസ് ഹൗസിലേക്ക് എത്തിയ പുതിയ മത്സരാർത്ഥികൾ.